Ныбджэгъу лъапIэхэр! Адыгабзэмрэ тхыбзэмрэ я МафэмкIэ сышъуфэгушIо!
Лъэпкъ пэпчъкIэ иныдэлъфыбзэ лъэпкъ зыкIыныгъэм итамыгъэу, осэнчъэ мылъкоу, лъэпкъ культурэм ылъапсэу, блэкIыгъэмрэ къэкIощтымрэ зэзыпхырэ амалэу щыт.
Тикультурэрэ тыбзэрэ къытфэзыухъумэгъэ лIэужхэр дгъэлъапIэзэ, а кIэн баир къэухъумэгъэнымкIэ, лIэшIэгъу пчъагъэмэ къазэпырахыгъэ хабзэхэр, культурэ шIуагъэхэр къыткIэхъухьэхэрэм алъыгъэIэсыгъэнхэмкIэ тфэлъэкIырэр зэкIэ тшIэн фае.
Адыгабзэ зыIулъхэр зэкIэ ныдэлъфыбзэр къызэтегъэнэжьыгъэным, ныбжьыкIэхэм лъэпкъ литературэмрэ хабзэхэмрэ нахь куоу зэрагъэшIэнхэм япхыгъэ Iофыгъохэм язэшIохын нахь чанэу къыхэдгъэлэжьэнхэ фае.
КIэлэегъаджэхэм, наукэм, культурэм, искусствэм яIофышIэхэм, зишIэныгъэкIэ хьалэлэу ныбжьыкIэхэм адэгощэрэ, адыгабзэр зэзыгъашIэ, адыгэ хабзэхэм, лъэпкъ культурэм афэгъэхьыгъэу нахьыбэ зышIэ зышIоигъо пстэуми мы мафэм тызэрафэразэр ясэIо.
Ныбджэгъу лъапIэхэр, псауныгъэ пытэ, насып, щыIэкIэ-псэукIэ дэгъу шъуиIэнэу, адыгабзэмрэ культурэмрэ жъугъэлъэпIэнэу сышъуфэлъаIо!
Адыгэ Республикэм илIышъхьэу КъумпIыл Мурат
14.03.2014
Comments
Post a Comment