Адыгэ Республикэм и ЛIышъхьэу КъумпIыл Мурат псэупIэхэм яшIын зимылъку хэзылъхьагъэу агъэпцIагъэхэм IэпыIэгъу афэхъугъэнымкIэ зэшIуахырэм ыкIи непэрэ мафэм ехъулIэу мы IофшIэным зэфэхьысыжьэу фэхъугъэхэм защытегущыIэгъэхэ зэхэсыгъо тыгъуасэ зэхищагъ.
Iофтхьабзэм хэлэжьагъэх республикэм ипрокурорэу Игорь Шевченкэр, Адыгеим илIыкIоу Краснодар краим иадминистрацие ипащэ дэжь щыIэ Александр Наролиныр, АР-м и ЛIышъхьэрэ министрэхэм я Кабинетрэ я Администрацие ипащэ игуадзэу Хъоткъо Саниет, къэлэ гъэпсыкIэ зиIэ поселкэу Яблоновскэм ипащэу Атэжьыхьэ Заурдин, псэолъэшI компание-инвесторым илIыкIохэр.
КъумпIыл Мурат къызэриIуагъэмкIэ, фэтэрыбэу зэхэт унэхэм яшIын зиахъщэ хэзылъхьагъэу агъэпцIагъэхэм ягумэкIыгъо шъолъырым щыдэгъэзыжьыгъ пIоми ухэукъощтэп. Мы Iофыгъом епхыгъэу республикэм ипащэ цIыфхэм бэрэ зыкъыфагъэзагъ. Iофхэм язытет зэгъэшIэгъэным фэшI Адыгеим и ЛIышъхьэ Тэхъутэмыкъое районым щыIагъ. ЦIыфхэм IэпыIэгъу афэхъугъэным фэшI муниципалитетым ыкIи АР-м псэолъэшIынымкIэ и Министерствэ пшъэрылъ гъэнэфагъэхэр афишIыгъэх.
Республикэм ипащэхэм аштэгъэ гъогу картэм ишIуагъэкIэ псэупIэ комплексэу «Тургеневский-2» зыфиIорэм ишIын аухыжьын алъэкIыгъ. Непэрэ мафэм ехъулIэу гумэкIыгъо зыдэщыIэ зы объект закъу ныIэп шъолъырым къинагъэр – ЖСК-у «Подсолнух» зыфиIорэм ышIырэ фэтэри 134-рэ хъурэ унэр. Ар поселкэу Яблоновскэм дэт. 2017-рэ илъэсым Тэхъутэмыкъое район хьыкумым унашъоу ышIыгъэм диштэу гъэпцIагъэ зыхэлъ бзэджэшIагъэ зезыхьэгъэ нэбгыритIумэ пшъэдэкIыжь арагъэхьыгъ.
Шъолъырым ипащэхэм мы гумэкIыгъом хэкIыпIэ къыфагъотыгъ, унэм ишIын зимылъку хэзылъхьагъэу агъэпцIагъэхэм IэпыIэгъу зэрафэхъущтхэ шIыкIэр агъэнэфагъ. Ащ пае гъогу картэ зэхагъэуцуагъ. Мы псэуалъэм ишIын хэлажьэхэрэм компенсацие ятыжьыгъэныр ащ къыдыхэлъытагъ. ПсэолъэшI компаниеу «Аврамов» зыфиIорэм ишIуагъэкIэ нэбгыри 100-м ехъумэ мыщ фэдэ ахъщэ IэпыIэгъу аIукIэщт.
Адыгеим и ЛIышъхьэ пшъэрылъ афишIыгъ гъогу картэм къыгъэнэфэрэ лъэныкъо пстэуми ягъэцэкIэн фежьэнхэу, ищыкIагъэ хъумэ цIыфхэм юридическэ IэпыIэгъу арагъэгъотынэу.
- Зыкъытфэзгъэзэрэ цIыфхэм ягумэкIыгъохэр зэхэтфынхэм тынаIэ тет. Мы Iофыгъо къызэрымыкIом изэшIохын бэшIагъэ тызыпылъыр. ЧIыпIэ къин ифэгъэ цIыфхэм IэпыIэгъу тафэхъуным фытегъэпсыхьэгъэ IофшIэныр зэхэтэщэ. Компаниеу «Подсолнух» зыфиIорэмкIи непэ хэкIыпIэ къэдгъотыгъ, — къыIуагъ КъумпIыл Мурат.
Адыгэ Республикэм и ЛIышъхьэ ипресс-къулыкъу
Comments
Post a Comment