Дин хасэм изэфэс Къэрдэн Аскэрбый муфтиеу хадзыжьыгъ

Сурэтхэр: dumraikk.ru

Адыгэ Республикэм ыкIи Краснодар шъолъыр ащыпсэурэ бысмэнхэм ядин хасэ изэфэс шэкIогъум и 19-м Мыекъуапэ щы­кIуагъ. Ащ Iофыгъо зэфэшъхьафхэм щатегущыIагъэх. Ахэм ащыщых 2016-рэ илъэсым къыщегъэжьагъэу 2020-рэ илъэсым нэс Дин хасэм IофшIэнэу ыгъэцэкIагъэм изэфэхьысыжьхэр, муфтиир, хэсашъхьэр ыкIи уплъэкIо купым хэтыщтхэр кIэу хэдзыжьыгъэнхэр.

Адыгэ Республикэм  и лIышъхьэу КъумпIыл Мурат ыцIэкIэ зэфэсым хэлэжьагъ Адыгэ Республикэм  лъэпкъ IофхэмкIэ, IэкIыб къэралхэм ащыпсэурэ лъэпкъэгъухэм адыряIэ зэпхыныгъэхэмкIэ ыкIи къэбар жъу­гъэм иамалхэмкIэ и Комитет итхьэматэу Шъхьэлахъо Аскэр.

Пэублэм дин хасэ имуфтиеу Къэрдэн Аскэрбый илъэсиплIым къыкIоцI Iофэу ашIагъэм игъэкIоты­гъэу къытегущыIагъ.

Iофыгъо шъхьаIэу зэфэсым иIагъэр хэдзынхэр ары. АщкIэ, дин хасэм имуфтиеу Къэрдэн Аскэрбый хадзыжьыгъ. Джащ фэдэу хэсашъхьэм хэтыщтхэр ыкIи уплъэкIо купым хэтыщтхэр хадзыгъэх.