Иорданием къикIи непэ къэбар гухэкI къытлъыIэсыгъ. Общественнэ ыкIи политическэ IофышIэшхоу Шъэбрыкъо Мунир идунай ыхъожьыгъ.
Иорданием щыпсэурэ тилъэпкъэгъухэу анахь къахэщыхэрэм, агъэлъапIэхэрэм, лъытэныгъэшхо зыфашIыхэрэм ар ащыщыгъ, илъэсыбэрэ къэралыгъом и Парламент хэтыгъ, джащ фэдэу иправительстви щылэжьагъ.
Шъэбрыкъо Мунир тарихъ чIыгужъым ыкIи IэкIыбым ащыпсэурэ адыгэхэм язэпхыныгъэ гъэпытэгъэным чанэу дэлэжьагъ, Адыгеим бэрэ къакIощтыгъ, Дунэе адыгэ хасэм иIофшIэн игъэкIотыгъэу хэлэжьагъ. ШIушIэн Iофэу зэрихьагъэми игугъу къэпшIынэу тефэ.
Иорданием Шъэбрыкъо Мунир лъэшэу щалъытэщтыгъэ.
Тхьэм Джэнэт лъапIэр къырет!
Адыгэ Республикэм и лIышъхьэу КъумпIыл Мурат
Comments
Post a Comment