Адыгэ Республикэм ихьыкумэт зичэзыу зэхэсыгъоу Iоныгъом и 14-м иIагъэм тхьамэтагъор щызэрихьагъ Адыгэ Республикэм и ЛIышъхьэу КъумпIыл Мурат. Республикэм иминистрэхэм я Кабинет ипащэ ылъэныкъокIэ унашъоу ышIыгъэр Iофтхьабзэм къыщиIуагъ.
Адыгэ Республикэм и ЛIышъхьэ иунашъоу Iоныгъом и 14-м къыдэкIыгъэм къызэрэщиIоу, республикэм экономикэ хэхъоныгъэмкIэ ыкIи сатыумкIэ иминистрэу Геннадий Митрофановым иIэнатIэ къегъэтIылъы ыкIи Адыгэ Республикэм и Премьер-министрэ ипшъэрылъхэр ыгъэцэкIэнхэу агъэнафэ.
Шъугу къэдгъэкIыжьын, 2020-рэ илъэсым шышъхьэIум и 4-м нэс Адыгэ Республикэм ихьыкумэт пэщэныгъэ дызезыхьагъэр Александр Наролиныр ары. НэмыкI IофшIапIэ зэрэIухьэрэм къыхэкIэу ащ ежь-ежьырэу иIэнатIэ къыгъэтIылъыгъ.
Геннадий Митрофановыр Адыгэ Республикэм и Премьер-министрэ ипшъэрылъхэр ыгъэцэкIэнхэу зэригъэнэфагъэм КъумпIыл Мурат къытегущыIэзэ, исэнэхьат хэшIыкIышхо фызиIэу ар зэрэщытыр ыкIи Республикэм ихэбзэ къулыкъухэм Iоф ащишIэнымкIэ шIэныгъэ зэрэIэкIэлъыр хигъэунэфыкIыгъ.
Адыгэ Республикэм и парламент зичэзыу зэхэсыгъоу иIэщтым Геннадий Митрофановыр мы IэнатIэм IугъэхьэгъэнымкIэ икандидатурэ депутатхэр хэплъэщтых. Ащ ехъулIэу ищыкIэгъэ тхьапэхэр агъэхьазырынхэу ЛIышъхьэ къафигъэпытагъ.
КъумпIыл Мурат
Геннадий Митрофанов
Comments
Post a Comment