Адыгэ Республикэмрэ Краснодар шъолъырымрэ ащыпсэурэ бысмэнхэм я хасэ унашъо ышIыгъ шышъхьэIум и 14-м, 2020-рэ илъэсым, щегъэжьагъэу бэрэскэшхо нэмазхэр мэщытхэм ащырагъэжьэжьынхэу.
Мыекъуапэрэ Адыгэкъалэрэ адэт мэщытхэм гъэцэкIэжьынхэр зэращыкIохэрэм къыхэкIэу нэмазхэр ащашIыщтхэп.
Узым зыщыухъумэгъэн шапхъэхэр гъэцэкIэгъэнхэм фэшI имамхэр къызэрэгущыIэхэрэр дакъэ 15-м рамыгъэхъунэу, мэщытым къекIолIэрэ цIыфхэм ящыкIагъэр зэкIэ аIыгъынэу, ом изытет дэгъу зыхъукIэ мэщытым къыпэIулъ чIыпIэхэм тхьэлъэIухэр ащашIынхэу дин хасэр цIыфхэм къяджэ.
Джащ фэдэу мэщытым къычIэхьэгъэ цIыфхэм аIапэ зэрамыгъэубытымэ ыкIи IаплI зэрамыщэкIымэ, сымаджэхэу мыщ къэмыкIохэмэ нахьышIу, ащ дакIоу узыухъумэщт пкъыгъохэр агъэфедэнхэм анаIэ тырагъэтын фае.
Илъэс 65-м ехъугъэхэр мэщытым мыкIонхэу зафагъазэ. Мы пстэури гъэцэкIагъэ зэрэхъурэм лъыплъэщтхэр ыкIи пшъэдэкIыжь зыхьыщтхэр имамхэр арых.
Comments
Post a Comment