Къурмэн мэфэкI мафэм иапэрэ мафэр бэдзэогъум и 31-м ыублэщт. Ащ фэгъэхьыгъэу Адыгэ Республикэмрэ Пшызэ шъолъырымрэ коронавирус узым зимыушъомбгъуным пае Адыгэ Республикэмрэ Пшызэ шъолъыррэ ащыпсэурэ бысмэнхэм я Дин хасэ шъхьаI цIыфхэм къяджэ Къурмэн мэфэкIыр яунагъо исхэм адагъэмэфэкIынэу, джащ фэдэу дин хасэм мэкъэгъэIу къытыгъ.
Мэщытхэм ыкIи зэхэтхэу нэмаз зыщашIырэ ащ пэгъунэгъу чIыпIэхэм Къурмэн мэфэкIым епхыгъэ Iофтхьабзэхэр ащыкIощтхэп.
Адыгэкъалэрэ Кощхьаблэрэ ащыпсэухэу коронавирусыр къызэузыхэрэм япчъагъэ зэрэхахъорэм къыхэкIыкIэ унашъо ашIыгъ охътэ гъэнэфагъэкIэ мы чIыпIэхэм мэщытхэр ащызэфашIынхэу.
Адыгэ Республикэмрэ Пшызэ шъолъыррэ ащыпсэурэ бысмэнхэм я хасэ джащ фэдэу цIыфхэм агу къегъэкIыжьы мэщытым зыкIохэкIэ къэзыухъумэхэрэ пэIухъохэ аIулъынхэу ыкIи Iэбыцухэр апылъынхэу, нэмаз зыщашIырэ яалырэгъу цIыкIухэр зыдаIыгъынхэу, метрэ I,5-рэ язэпэчыжьагъэу щытынхэу, яIэхэр зэнамыгъэсынэу ыкIи IаплI зэрамыщэкIынэу, пэпс-къикI ыкIи нэмыкI уз горэхэм инэшанэ зиIэхэр мэщытым къемыкIолIэнхэу. Илъэс 65-рэ зыныбжьхэр ыкIи нахьыжъхэр мэщытым мыкIохэмэ нахьышIу.
Comments
Post a Comment