Мэкъуогъум и II-м, Адыгэ Республикэм и ЛIышъхьэу КъумпIыл Мурат мылым тетхэу спорт зыщашIырэ унэу «Ошъутен» зыфиIорэм щыIагъ ыкIи мыр къызэIуахыным зэрэфэхьазырым зыщигъэгъозагъ.
Мы унэр ашIыным 262-рэ милион рубл фэдиз тефагъ. Ар аужырэ шапхъэхэм адиштэу зэтырагъэпсыхьагъ. ТIысыпIэ 360-рэ фэдиз чIэт.
Адыгэ Республикэм спортымкIэ и Комитет итхьаматэу Дэгужъые Мурат къызэриIуагъэмкIэ, хоккеир зикIасэхэу республикэм щыпсэухэрэм илъэс заулэкIэ узэкIэIэбэжьымэ Федерацие зэхащагъ, ащ нэбгырэ 25-рэ хэхьагъ.
Мы мафэм мыл-тет спорт унэм къытехьагъэх ыкIи яIэпэIэсэныгъэ къагъэлъэгъуагъ Адыгеим хоккеимкIэ и Федерацие ипащэу КIыкI Ахьмэдрэ спортсмен ныбжьыкIэу Шъхьэлэхъо Тимуррэ. Адыгэ Республикэм и ЛIышъхьэ ахэм гущыIэгъу афэхъугъ.
"Мы унэм ныбжьыкIэхэр къызэрищэлIэнхэу, ащ иамалкIэ япсауныгъэ агъэпытэным анаIэ тырагъэтынэу тыщэгугъы. Мы аужырэ илъэсхэм республикэм испорт инфраструктурэ зэхъокIыныгъэшIухэр фэхъугъэх. Джы проектэу «Спортыр — щыIэныгъэм ишапхъ» зыфиIорэм ишIуагъэкIэ хоккеим ыкIи мыл-тет спортым Адыгеим защаушъомбгъущт.",- джащ фэдэу КъумпIыл Мурат ифейсбук нэкIубгъо къыщиIуагъ.
Comments
Post a Comment