Сирием щыщ адыгэ бзылъфыгъэм Урысыем щеIэзэнхэм пае ахъщэ фаугъои


Налщыч, мэзаим и 24

Тамыхъу Динэ пае интернет социальнэ нэкIубгъохэм мылъку ащаугъоинэу рагъэжьагъ. Сирием щыпсэурэ бзылъфыгъэм Урысыем щеIэзэнхэм пае псауныгъэр къэухъумэгъэнымкIэ Къэбэртэе-Бэлъкъарым иминистерство дэIэпыIэнэу хьазыр. Ау гъогу уасэм пае ахъщэ ищыкIагъ, къыIуагъ цIыфыбэ зэхахьэу "Очаг" итхьэматэ.

Илъэс 48 зыныбжь Тамыхъу Динэ IэпыIэгъум кIэлъэIоу республикэ пащэхэм тхыгъэ афигъэхьыгъ. Фитыныгъэхэм яухъумэнкIэ Къэбэртэе-Бэлъкъарым игупчэ ишIуагъэкIэ республикэм илIышъхьэ фагъэхьыгъ. Тамыхъу Динэ Урысые Федерацием игражданство иI ыкIи федеральнэ мылъкукIэ еIэзэнхэм пае Къэбэртэе-Бэлъкъарым ипащэ зыфагъэзагъ.

Тамыхъу Динэ итхыгъэ къызэрэщиIуагъэмкIэ, адэбз уз иI ыкIи мылъкубэ зытефэщт Iэзэгъу къалэу Обнинск щикIунэу ищыкIагъ. Бзылъфыгъэр шъузаб, зыныбжь имыкъугъэ сабыи 2 епIух. ИIахьылхэм янахьыбэ заом зэрэхэкIодагъэхэр е нэмыкI хэгъэгухэм кIощыжьынхэ фае зэрэхъугъэр ыкIи ащ къыхэкIэу Сирием къыдеIэн зэрэщымыIэр къетхых. Ежь-ежьырэу Сирием къикIижьынышъ, ихэку къэкIожьынэу пчъагъэрэ фежьагъ, ау фэгъэхъугъэп.

Джащ фэдэу къызэриIуагъэмкIэ, ятэжъ пIашъэхэр Къэбэртае щыщых, Урыс-Кавказ заом ыуж Осман пачъыхьэгъум кIожьыгъагъэх.

Тамыхъу Динэ пае мылъкум иугъоин цIыфыбэ зэхахьэу "Очаг" фежьагъ. Ащ ипащэу Бэгърэт Ольга къызэриIуагъэмкIэ, бзылъфыгъэм еIэзэнхэм пае зэкIэ ищыкIэгъэщт мылъкум фэдиз аугъоин алъэкIыщтэп, ау Урысыем зэрицIыфым пае еIэзэнхэм пае хабзэр къадеIэщт. Гъогу IофымкIэ ежьхэр дэIэпыIэщтых.
Псауныгъэр къэухъумэгъэнымкIэ Къэбэртэе-Бэлъкъарым иминистерство бзылъфыгъэм IэпыIэгъу фэхъунхэу къыщагъэгугъагъэх. Сирием къикIинышъ псынкIэу республикэм Динэ къэкIон фай, мыщ иуз къыщагъэшъыпкъэжьынышъ, еIэзэнхэу агъэкIоным пае ищыкIагъэ тхылъхэр щаугъоищтых.

Налщыч къызысыкIэ зэрысыщт уни къыфагъотыщт, медицинэ тхылъхэм ягъэпсынкIи IэпыIэгъу фэхъущтых.

Интернет социальнэ нэкIубгъохэр зыгъэфедэхэрэр Тамыхъу Динэ дэIэпыIэнхэу рагъэжьагъ. Бзылъфыгъэр къакIомэ зиунэ изгъэтIысхьанэу хьазырхэри къафэтхагъэх.

Джащ фэдэу социальнэ нэкIубгъохэм къызэрэщатхырэмкIэ, Динэ изытет хьылъэ, изакъоу Урысыем къэкIоныр къин къыфэхъущт ыкIи псынкIэу мы Iофыр зэшIохыгъэ хъуным пае Урысые посольствэу Сирием щыIэмэ дэгущыIэгъэн фаеу алъытэ.

adyg-afisha.ru

Comments