КъумпIыл Мурат Адыгэ Республикэм ипрезидентыгъэхэм аIукIагъ


Адыгэ Республикэм и ЛIышъхьэ ипшъэрылъхэр пIэлъэ гъэнэфагъэкIэ зыгъэцэкIэрэ КъумпIыл Мурат кIэщакIо зэрэфэхъугъэм тетэу республикэм ипрезидентыгъэхэу Джарымэ Аслъан, Шъэумэн Хьазрэт, ТхьакIущынэ Аслъан Адыгеим и Правительствэ зычIэт унэм щаIукIагъ.

Республикэм и ЛIышъхьэ ипшъэрылъхэр пIэлъэ гъэнэфагъэкIэ зыгъэцэкIэрэ КъумпIыл Мурат зэрэхигъэунэфыкIыгъэмкIэ, ахэр зэп зэрэзэIукIэхэрэр, ащ къегъэлъагъо пащэхэм зэIэпахызэ, политикэ курс тэрэз республикэм зэрэщыпхыращырэр, джырэ хэбзэ Iэшъхьэтетхэр нахьыжъхэм яушъый Iушхэм зэракIэдэIукIыхэрэр, республикэр зыпкъ итэу хэхъоныгъэм игъогу пытэу зэрэрыкIорэр.

«Адыгеим шъо бэ фэшъушIагъэр, Урысые Федерацием исубъект ар хъунымкIэ Iофышхо зэшIошъухыгъ. Республикэм къырыкIощтым непи шъузэригъэгумэкIырэм, шъуиопыткIэ шъуадэгощэным шъузэрэфэхьазырым апае «тхьашъуегъэпсэу» шъосэIо. Тэ тигуапэу шъуиопыт тиIофшIэн щыдгъэфедэщт», — къыIуагъ КъумпIыл Мурат. ЗэIукIэгъум хэлэжьагъэхэр социальнэ-экономикэ Iофыгъохэм, республикэм хэхъоныгъэ ышIынымкIэ амалэу щыIэхэм атегущыIагъэх. ЦIыфхэм ящыIэкIэ-псэукIэ зыкъегъэIэтыгъэным фэIорышIэщт лъэныкъохэм алъыIэсыгъэх. Анахьэу анаIэ зытырагъэтыгъэр социальнэ инициативэхэм мэхьанэшхо зэряIэр, экономикэм иотраслэхэм хэхъоныгъэ зэрашIыщт инновационнэ амалхэр къыхэхыгъэнхэр, республикэм инвестициехэр къыхягъэлъхьэгъэнхэ зэрэфаер ары.

ШIушIэным епхыгъэ проектхэм, Урысыем ишъолъырхэм нахьыбэу зэдэлэжьэныгъэ адыряIэным, сатыумкIэ зэпхыныгъэхэм зягъэушъомбгъугъэным, зэгъунэгъушIу зэфыщытыкIэхэр гъэпытэгъэнхэм япхыгъэ Iофыгъохэми атегущыIагъэх.

Джарымэ Аслъан, Шъэумэн Хьазрэт, ТхьакIущынэ Аслъан зэрэхагъэунэфыкIыгъэмкIэ, республикэм хэхъоныгъэ ышIыным пае стратегие тэрэз, кадрэ политикэ дэгъу щыIэнхэ, обществэр зэкъогъэуцогъэн, лъэпкъ зэгурыIоныгъэмрэ мамырныгъэмрэ гъэпытэгъэнхэ фае. Джащыгъур ары республикэм социальнэ-экономикэ хэхъоныгъэ ин зишIыщтыр, Адыгеим ихэбзэ Iэшъхьэтетхэм ар япшъэрылъ шъхьаIэу щыт.

Джарымэ Аслъан республикэр ылъэ зыщытеуцогъэ апэрэ илъэсхэм мэхьанэшхо зиIэгъэ лъэбэкъоу ашIыгъэхэм къатегущыIагъ. А лъэхъаным политикэ гъэпсын Iофхэр ары анахьэу анаIэ зытырагъэтыщтыгъэхэр. Ащ ыуж къикIыгъэхэм республикэм хэхъоныгъэ зэришIыщт программэхэу агъэнэфагъэхэр пхыращынхэр япшъэрылъыгъ. 2002-рэ илъэсым къыщегъэжьагъэу 2007-рэ илъэсым нэс Адыгэ Республикэм пэщэныгъэ дызезыхьэгъэ Шъэумэн

Хьазрэт мыщкIэ Iофышхо зэшIуихыгъ. Джы къызнэсыгъэми Шъэумэн Хьазрэт ишIушIэ IэпыIэгъу бэмэ агу къэкIыжьы, пащэм ишIуагъэкIэ социальнэ Iофыгъо заулэ зэшIохыгъэ хъугъагъэ.

ТхьакIущынэ Аслъан илъэси 10 республикэм пэщэныгъэ зыщыдызэрихьэгъэ лъэхъанми гъэхъагъэ хэлъэу проектыбэ щыIэныгъэм щыпхыращыгъ. А уахътэм къыкIоцI лъэныкъо зэфэшъхьафхэм IофшIэнымкIэ опыт шIукIае щыряIэ хъугъагъэ. Адыгеир зыпкъ итэу хэхъоныгъэ зышIырэ шъолъырэу хъугъэ, федеральнэ гупчэм мызэу, мытIоу ащ осэшхо къыфишIыгъ. Анахь шъхьаIэр республикэм тапэкIэ хэхъоныгъэ ышIынымкIэ лъэпсэшIу зэрэзэхащагъэр ары.

КъумпIыл Мурат зэрэхигъэунэфыкIыгъэмкIэ, гъэхъагъэу республикэм иIэхэр къэухъумэгъэнхэм пае непэ афэлъэкIыщтыр зэкIэ ашIэным мэхьанэшхо иI. Адыгэ Республикэм и ЛIышъхьэ ипшъэрылъхэр пIэлъэ гъэнэфагъэкIэ зыгъэцакIэрэм республикэм ипэщагъэхэм къафиIотагъ непэ пшъэрылъ шъхьаIэу щытхэм, цIыфхэм ящыIэкIэ-псэукIэ зыкъегъэIэтыгъэным тегъэпсыхьэгъэ проектхэр зэрагъэцакIэхэрэм афэгъэхьыгъэу.

Шъугу къэтэгъэкIыжьы мы илъэсым имэлылъфэгъу КъумпIыл Мурат Адыгэ Республикэм ипрезидентыгъэхэу Джарымэ Аслъанрэ ТхьакIущынэ Аслъанрэ зэраIукIэгъагъэр. Джащыгъум ахэр социальнэ-экономикэ Iофыгъохэм, республикэм хэхъоныгъэ ышIынымкIэ амалэу щыIэхэм атегущыIэгъагъэх.

Адыгэ Республикэм и ЛIышъхьэ ипресс-къулыкъу


Comments