Я ХIХ-рэ лIэшIэгъум Урыс Кавказ заоу щыIагъэм фэгъэхьыгъэ шъыгъо-шIэжь мафэр жъоныгъуакIэм и 21-м Мыекъуапэ щыкIощт.
Iофтхьабзэм изэхэщэкIо куп изэхэсыгъо унэшъо хэхыгъэхэр щырахъухьагъэх.
Адыгэ Республикэм лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет ипащэу Шъхьэлэхъо Аскэр къызэриIуагъэу, зэхахьэм хабзэм икъулыкъушIэхэр, общественнэ движениехэм, еджапIэхэм, IофшIапIэхэм ялIыкIохэр хэлэжьэщтых. Илъэси 100-м нахьыбэрэ кIогъэ лъэпкъ лъэпсэич заом фэдэ тичIыгу къыщымыхъужьыным, мамыр псэукIэм игъэпытэн, нэмыкI Iофыгъохэм А. Шъхьэлахъор къатегущыIагъ.
ЗэхэщэкIо купым хэтыхэу ЛIымыщэкъо Рэмэзан, Хэкужъ Адам, Агъыржьэнэкъо Саныет, фэшъхьафхэм яеплъыкIэхэр къаIуагъэх. Концерт-реквиемыр «Ислъамыем» къытыщт. Мыекъуапэ изыгъэпсэфыпIэ парк къыщырагъэжьэнышъ, зэхахьэм хэлажьэхэрэр къалэм иурам шъхьаIэу Краснооктябрьскэм къырыкIощтых. Филармонием Iофтхьабзэр щылъагъэкIотэщт.
Comments
Post a Comment