Адыгэ ныпым и мафэ Адыгэ Республикэм мэлылъфэгъум и 25-м щагъэмэфэкIыщт. Республикэм лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет зэхэщэкIо купым изэхэсыгъо щыкIуагъ.
Комитетым итхьаматэу Шъхьэлэхъо Аскэр къызэриIуагъэу, хабзэм икъулыкъушIэхэмрэ общественнэ движениехэмрэ зэгъусэхэу мэфэкIыр зэхащэщт. Къэлэ паркым къыщаублэнышъ, быракъхэр аIыгъэу Мыекъуапэ иурам шъхьаIэу Краснооктябрьскэм къырыкIощтых. Шыухэр апэ итхэу автомобильхэр зыхэт купышхори къалэм иурамхэм къарыкIощтых. Ахэми адыгэ быракъхэр агъэбыбэтэщтых.
Республикэм и Къэралыгъо филармоние мэфэкI зэхахьэр щыкIощт. Концертым дунаим щыцIэрыIо ансамблэу «Налмэсыр», Адыгеим иартистхэр хэлэжьэщтых. ЗыкIыныгъэмрэ Зэзэгъыныгъэмрэ ясаугъэтэу филармонием ыпашъхьэ щытым дэжь хэушъхьафыкIыгъэ зэIукIэгъухэр щыкIощтых, адыгэ быракъыр щаIэтын ямурад.
Comments
Post a Comment