Темрезов Рэщыд, КъумпIыл Муратр, КIокIо Казбек
Къэбэртэе-Бэлъкъар Республикэм и лIышъхьэу КIокIо Казбек
КIокIо Казбек Адыгэ Республикэр загъэпсыгъэм и МафэкIэ республикэм щыпсэухэрэмрэ и ЛIышъхьэу КъумпIыл Муратрэ Инстаграм нэкIубгъомкIэ къафэгушIуагъ.
Адыгэ Республикэм щыпсэухэрэмрэ республикэм и ЛIышъхьэу КъумпIыл Муратрэ мэфэкIымкIэ сыгу къыздеIэу сафэгушIо.
Адыгэ Республикэм ичIыопс ихьалэмэтыгъэ, итарихъ, икультурэ ябаиныгъэ, шэн-хэбзэ дахэу щызэрахьэрэмкIэ Урысые Федерацием и дышъэ кIэнэу иI.
ЗекIоным, мэкъу-мэщым, промышленностым чанэу хэхъоныгъэхэр республикэм щашIы, чылагъо лъэныкъом мэхьанэшхо щыраты, аужырэ шапхъэхэм адиштэрэ инфраструктурэ щыгъэпсыгъэным пылъых. Адыгеим и ЛIышъхьэу КъумпIыл Мурат ихьатыркIэ ыкIи цIыфэу щыпсэухэрэм ягуетыныгъэкIэ ахэр зэкIэ гъэцэкIагъэ мэхъух.
Непэрэ мафэм ткъош республикэу Адыгеим щыпсэухэрэм псауныгъэ пытэ ыкIи насып дахэ яIэу тапэкIэ хэхъоныгъэхэр ашIынэу сафэлъаIо, — къыщеIо тхыгъэм.
Къэрэщэе-Черкес Республикэм и лIышъхьэу Темрезов Рэщыд
Адыгэ Республикэм и ЛIышъхьэрэ цIыфэу щыпсэухэрэмрэ республикэр загъэпсыгъэ МафэмкIэ сыгу къыздеIэу сафэгушIо! — къыщеIо тхыгъэм.
Культурэм игъэшIэгъоныгъэкIэ, тарихъ баеу ыкIи чIыопс дахэу иIэмкIэ зекIо мин пчъагъэмэ Адыгеир къызэрэхахырэр ащ къыхигъэщыгъ.
Адыгэ Республикэм и ЛIышъхьэ ыкIи цIыфэу щыпсэухэрэм IофшIэнышхоу зэшIуахыгъэм яшIуагъэкIэ, социальнэ ыкIи экономикэ лъэныкъохэм хэхъоныгъэхэр ашIых. Анахь мэхьэнэ ин зиIэ лъэныкъохэу мэкъу-мэщыр, зекIоныр, промышленностыр къахэщырэмэ ащыщых.
ХьакIэм зэрэпэгъокIыхэрэмкIэ, тарихъыр, шэн-хабзэхэр шIулъэгъуныгъэ афыряIэу зэрэзэрахьэхэрэмкIэ ткъош республикэу Адыгеим ыцIэ сыдигъуи чыжьэу Iущтыгъэ. Ахэр зэкIэ Къэрэщэе-Щэрджэсым щыпсэурэ нэбгырэ пэпчъ къыгурэIох ыкIи елъытэх.
Къэрэщэе-Черкес Республикэм щыпсэухэрэм ацIэкIэ ыкIи сэ сцIэкIэ Адыгеим рэхьатныгъэ илъэу, тапэкIи игъэхъагъэхэм ахигъахъозэ псэунэу фатIозэ тыфэгушIо. Унагъо пэпчъ шIулъэгъуныгъэр, лъытэныгъэр ыкIи хахъор щыбэгъонхэу тафэлъаIо, — Инстаграм нэкIубгъом къыритхагъ Темрезов Рэщыдэ.
Comments
Post a Comment