29.09.2017
Адыгэ Республикэм и ЛIышъхьэу КъумпIыл Мурат Къэрэщэе-Щэрджэс Республикэр зызэхащагъэр илъэс 25-рэ зэрэхъурэм фэгъэхьыгъэ мэфэкI Iофтхьабзэхэм ахэлэжьагъ.
МэфэкIым ехъулIэу спортымкIэ Дворецэу «Юбилейнэр» Черкесскэ къыщызэIуахыгъ. БассейнитIу, спортзал, тренировочнэ залхэр зыхэт спорт псэолъакIэр къэралыгъо, унэе мылъкукIэ агъэпсыгъ.
ЗыгъэпсэфыпIэ паркэу «Зеленый остров» зыфиIорэм официальнэ Iофтхьабзэхэр щыкIуагъэх. Республикэм щыпсэухэрэм къафэгушIуагъэх Урысые Федерацием и Президент и Полномочнэ лIыкIоу СКФО-м щыIэ Олег Белавенцевыр, Темыр Кавказым иIофхэмкIэ Урысые Федерацием иминистрэу Лев Кузнецовыр, Федеральнэ агентствэм лъэпкъ IофхэмкIэ ипащэу Игорь Бариновыр, Къыблэ Осетием ипрезидентэу Анатолий Бибиловыр, ЮФО-мрэ СКФО-мрэ япащэхэр.
Адыгеим и ЛIышъхьэу КъумпIыл Мурат ишIуфэс псалъэ зэрэщыхигъэунэфыкIыгъэмкIэ, илъэс 25-м къыкIоцI Къэрэщэе-Щэрджэсым къэралыгъо гъэпсынымкIэ ыкIи экономикэм хэхъоныгъэ егъэшIыгъэнымкIэ гъогушхо къыкIугъ, социальнэ лъэныкъом, гъэсэныгъэм, культурэм яхэхъоныгъэкIэ бэ ашIагъ.
«Къэрэщэе-Щэрджэсым щыпсэухэрэр агу етыгъэу зэрэлажьэхэрэм, пащэхэм дэгъоу Iоф зэрашIэрэм яшIуагъэкIэ республикэм зэхъокIыныгъэшIухэр зэрэфэхъурэр хэгъэунэфыкIыгъэн фае, —— къыIуагъ Адыгеим и ЛIышъхьэ. —Къэрэщэе-Щэрджэсым Урысыем инэмыкI шъолъырхэм зэгъунэгъушIу зэфыщытыкIэхэу адыриIэхэр ыгъэпытэнхэм мэхьанэшхо ареты, Адыгэ Республикэми ар къыфэгъэхьыгъэу щыт. ЛIэшIэгъу пчъагъэкIэ узэкIэIэбэжьымэ, тазыфагу зэфыщытыкIэшIухэр илъ зэрэхъугъагъэм, Урысыем щыпсэурэ лъэпкъхэм яунэгъо зэгурыIожь хэтхэу мамырэу Iоф зэрашIэрэм неущырэ мафэр нахьышIу зэрэхъущтым, лъэныкъо пстэумкIи тизэпхыныгъэхэр зэрэпытэщтхэм тицыхьэ нахь тырегъэлъы».
Comments
Post a Comment