ШышъхьэIум и 1-м, 2017 илъэсым, Адыгэ Республикэм щыщ шIэныгъэлэжь цIэрыIоу, Адыгэ Республикэм и лъэпкъ музей итхьэмэтагъэу Абрэдж Алмир дунаем ехыжьыгъ.
Алмир лъэпкъ музейим ызэтегъэуцон имызакъоу Адыгэ лъэпкъ Iофхэм гупщысэ лъагэхэр хэлъэу ахэлэжьэщтыгъэ. 1990 гъэм, Адыгэ автоном областым Республикэ статус иIэным лъэщэу хэлэжьагъэхэм ащыщ. Джащ фэдэу 2005-2006 илъэсыхэм Адыгэ Республикэм истатус къыфэнэным лъэщэу хэлэжьагъ.
Адыгэ лъэпкъ ытэкъохьыгъэр ипкъ игъэуцожьыным фэгъэхьыгъэ гупщысэ лъагэхэр лъэпкъым хилъхьагъэх. Лъэпкъым игугъэ мафэу, къэзыгъэзэжьыгъэхэм я мафэ тефэу Алмир дунаем ехыжьыгъ. ШышъхьэIум и 2-м, Мыекъуапэ щагъэтIылъыжьыщт.
ЗыдэкIуагъэм тхьэм гупсэфэу щешI. И благъэ гупсэхэм тхьэм щэIэныгъэ къарет.
АдыгПлюс
Мы тхыгъэу ихэ чIэтыр АдыгПлюс ипочта къагъэхьыгъ
Абрэдж Альмир Нухьэ ыкъор
ШIэныгъэм, гъэсэныгъэм, культурэм яIофышIэхэм чIэнэгъэ ин ашIыгъ. Адыгэ Республикэм и Лъэпкъ музей илъэсыбэрэ пэщэныгъэ дызезыхьагъэу, Кавказ шъолъырым иобщественнэ IофышIэшхоу Абрэдж Альмир Нухьэ ыкъом идунай ыхъожьыгъ.
1945-рэ илъэсым А. Абрэджыр Хьатыгъужъыкъуае къыщыхъугъ. Къэбэртэе-Бэлъкъар къэралыгъо университетыр 1970-рэ илъэсым къыухыгъ. IэкIыб къэралыгъуабзэхэмкIэ кIэлэегъаджэу, журналистэу щытыгъ. Грузием шIэныгъэхэмкIэ и Академиеу Джавахишвили ыцIэ зыхьырэм иаспирантурэ щеджагъ. 1988-рэ илъэсым къыщегъэжьагъэу Адыгэ Лъэпкъ музеим ипэщагъ. 1989 — 1990-рэ илъэсхэм общественнэ движениеу «Адыгэ Хасэм» итхьаматэ игуадзэу щытыгъ, 1991 — 1994-рэ илъэс-
хэм Адыгэ Хасэм ипэщагъ.
Адыгеир Краснодар краим къызыхэкIыжьым, республикэм икъэралыгъо гъэпсыкIэ гъэпытэгъэным А. Абрэджым иIахьышIу хишIыхьагъ. Грузие заом кIэзыгъэстыхэрэм апэуцужьзэ, мамыр псэукIэм зегъэушъомбгъугъэным, цIыфым ифитыныгъэхэр къэухъумэгъэнхэм чанэу ахэлэжьагъ.
Абрэдж Альмир дунаим тет адыгэхэр зыщыпсэурэ къэралыгъохэм, Кавказ шъолъырым ицIыфыгъэкIэ ащашIагъ. Дунэе Адыгэ Хасэм, нэмыкI общественнэ движениехэм яIофшIэнхэм ахэлажьэзэ, лъэпкъхэм язэпхыныгъэ игъэпытэн пылъыгъ. Хэгъэгу, республикэ Iофхэу мэхьэнэ ин зиIэхэм защидзыещтыгъэп. Шъыпкъэныгъи, теубытагъи хэлъыгъэх. Къэралыгъоу зыщыпсэурэм шIу фишIэ шIоигъуагъ. Иныбджэгъухэм, зэфагъэ зыхэлъхэм пытэу акъоуцоныр, IэпыIэгъу афэхъуныр ишэныгъэх.
Къэбэртэе-Бэлъкъарым, Къэрэщэе-Щэрджэсым, Краснодар краим, Адыгеим, нэмыкIхэм къарыкIыгъэхэр А. Абрэджым ихьадагъэ щытлъэгъугъэх. ЩыIэныгъэ гъогоу къыкIугъэр лIыхъужъхэм яшэн-хабзэхэм афэзыгъэдагъэхэм тафэраз.
Абрэдж Альмир иунагъо, иIахьылхэм тафэтхьаусыхэ. Лъэшэу гухэкIышхо тщыхъугъ тиныбджэгъу лъапIэ дунаим зэрехыжьыгъэр. Хьатыгъужъыкъуаехэм якIэлэ пIугъэ лъэпкъ шIэжьым пыщагъэхэм сыдигъуи щысэтехыпIэу яIэщт. ЗыщапIугъэ къуаджэм ыцIэ ыгъэлъапIэзэ щыIэгъэ А. Абрэджыр ишIушIагъэкIэ къытхэтыщт, иIофшIагъэ лъыдгъэкIотэщт. УпчIэжьэгъоу зэрэтиIагъэм тыкъыпкъырыкIызэ, лъытэныгъэ фэтшIыщт.
Ныбджэгъу куп
Comments
Post a Comment