Адыгэ Республикэм и ЛIышъхьэ ипшъэрылъхэр пIэлъэ гъэнэфагъэкIэ зыгъэцэкIэрэ КъумпIыл Мурат Теуцожь районым зэкIом къуаджэу Джэджэхьаблэ дэс нахьыжъхэм аIукIагъ. ЗыгъэгумэкIырэ Iофыгъохэр къоджэдэсхэм республикэм ипащэ къыфаIотагъ.
ГущыIэм пае, сыхьатыр 8.00-м къыщегъэжьагъэу 16.00-м нэс Джэджэхьаблэ медицинэ IэпыIэгъу зэращаратырэр. НэмыкIрэ уахътэм район гупчэм къикIыхэзэ IэпыIэгъу псынкIэ арагъэгъоты, къоджэдэсхэм къызэраIуагъэмкIэ, ахэр бэрэ IэпыIэгъум ежэнхэ фаеу мэхъух. Теуцожь районым инэмыкI псэупIэхэм адэсхэри бэмышIэу ащ фэдэ IофыгъомкIэ республикэм ипащэ зыкъыфагъэзэгъагъ.
КъумпIыл Мурат Адыгэ Республикэм псауныгъэр къэухъумэгъэнымкIэ иминистрэу Мэрэтыкъо Рустем Iофым изытет зэхифынэу, Джэджэхьабли, нэмыкI къоджэ Iудзыгъэхэу ащ фэдэ Iофыгъохэр къызыщыуцугъэхэми IэпыIэгъу псынкIэм ипунктхэр ащызэхащэнымкIэ амалэу щыIэхэр зэригъэшIэнэу пшъэрылъ фишIыгъ.
Джащ фэдэу къоджэдэсхэм электроэнергиер къазэраIэкIахьэрэм ыгъэразэхэрэп, унэгъо кIоцIым щагъэфедэрэ техникэр бэрэ къутэу къыхэкIы. Республикэм ипащэ мы охътэ благъэм а Iофыгъом хэплъэнхэу хабзэм имуниципальнэ къулыкъухэм пшъэрылъ афишIыгъ.
Унэгъо былымэхъо фермэхэм зягъэушъомбгъугъэным епхыгъэ Iофыгъоми тегущыIагъэх. Республикэм и ЛIышъхьэ ипшъэрылъхэр пIэлъэ гъэнэфагъэкIэ зыгъэцакIэрэм псэупIэхэм яадминистрациехэм пшъэрылъ афишIыгъ къоджэдэсхэр хъупIэхэм яукъэбзын къыхагъэлэжьэнхэу, къэралыгъо IэпыIэгъу зэрагъэгъотырэ программэхэмкIэ цIыфхэм макъэ арагъэIунэу, ахэм ахэлэжьэнхэм пае документхэм ягъэхьазырынкIэ IэпыIэгъу афэхъунхэу.
АР-м и ЛIышъхьэ ипресс-къулыкъу.
Сурэтыр А. Гусевым тырихыгъ.
Comments
Post a Comment