22.09.2017
Урысые Федерацием и Правительствэ и Тхьаматэу Дмитрий Медведевыр Адыгеим къызэкIом, республикэм и ЛIышъхьэу КъумпIыл Мурат IофшIэгъу зэIукIэгъу дыриIагъ.
ЗэдэгущыIэгъум ипэублэм Дмитрий Медведевыр КъумпIыл Мурат фэгушIуагъ Адыгэ Республикэм и ЛIышъхьэ IэнатIэ зэрэхадзыгъэмкIэ ыкIи къыхигъэщыгъ цыхьэу къыфашIыгъэр къыгъэшъыпкъэжьыным зэрэщыгугъырэр. Ар къэбгъэшъыпкъэжьыным пае цIыфхэм ятхьаусыхэ тхылъхэм, ягумэкIыгъохэм республикэм и ЛIышъхьэ ышъхьэкIэ ынаIэ атыригъэтын фае.
Мы илъэсым бэдзэогъум Краснодар щызэдыряIэгъэ зэдэгущыIэгъухэм ауж Iофтхьабзэхэу зэрахьагъэхэм шъхьафэу зэIукIэгъум щатегущыIагъэх.
«Краснодар сыкъызэкIом, бэмышIэу орырэ сэрырэ тызэIукIэгъагъ. Джащыгъум еджэпIакIэм ишIынрэ псыр къызыдэкIым зэрар зыхьыгъэ чIыпIэхэр зыпкъ игъэуцожьыгъэнхэмрэ япхыгъэ Iофыгъохэм татегущыIэгъагъ. Iофхэр сыдэущтэу кIора? Сыд фэдэ унашъоха шъуштагъэхэр? КIэкIэу къэпIон хъумэ, Iофхэм язытет сыд фэд?» — къыкIэупчIагъ Дмитрий Медведевыр.
Адыгеим и ЛIышъхьэ къызэрэфэгушIуагъэм пае Урысые Федерацием и Правительствэ и Тхьаматэ зэрэфэразэр къыIуагъ ыкIи республикэм щыпсэурэ цIыфхэм, хэгъэгум и Президент, партиеу «Единая Россия» зыфиIорэм и Тхьаматэ цыхьэу къыфашIыгъэр къызэригъэшъыпкъэжьыщтым пае фэлъэкIыщтыр зэкIэ зэришIэщтымкIэ къыгъэгугъагъ.
«Краснодар тызщызэIокIэм тызытегущыIэгъагъэхэм афэгъэхьыгъэу къэпIон хъумэ, псыр къызыдэкIым зэрар зыхьыгъэ цIыфхэм IэпыIэгъу ятыгъэным пае Правительствэм къыхигъэкIыгъэ ахъщэр зынэсын фаехэм зэкIэми аIэкIагъэхьагъ. ЦIыфхэр афэразэх ахъщэ компенсацие къазэраратыгъэм пае. ЗычIэсыщт унэ зимыIэжьэу къэнагъэхэм сертификатхэр аIэкIагъэхьанхэм пае документхэр атыгъэх. Унашъом тежэ», — къыIуагъ КъумпIыл Мурат.
Адыгеим и ЛIышъхьэ сменитIоу еджапIэхэм ащемыджэнхэм фэгъэхьыгъэ IофшIэнэу зэшIуахырэм къытегущыIагъ. КъумпIыл Мурат къызэрэхигъэщыгъэмкIэ, мы илъэсым ыкIэм ехъулIэу къуаджэу АдыгеякIэм нэбгырэ 990-рэ зычIэфэщт еджэпIакIэм ишIын аухыщт. Илъэсэу къихьащтым республикэр щэгугъы федеральнэ мылъку IэпыIэгъу къыIэкIэхьаным ыкIи джыри зы еджапIэ ишIын рагъэжьэным.
«НепэкIэ я 2-рэ сменэу кIэлэцIыкIу мини 5 фэдиз еджэ. ЗэкIэ кIэлэеджакIохэр зы сменэ шIыжьыгъэнхэм пае анахь макIэми джыри еджэпIи 3 тшIын фае. А пшъэрылъыр зэшIохыгъэным пае непэ Мыекъуапэ IофшIэныр щырагъэжьэгъах. Псэуалъэхэм япроектхэм ыкIи чIыгу Iахьхэу ахэр зытетыщтхэм тадэлажьэ», — къыхигъэщыгъ КъумпIыл Мурат.
Къэралыгъо программэм зэрэхэлажьэхэрэм ишIуагъэкIэ республикэм иеджапIэхэм кIэлэцIыкIухэр зы сменэу ащырагъэджэнхэмкIэ Правительствэм къыгъэуцугъэ пшъэрылъыр республикэм ипащэхэм зэшIуахыным зэрэщыгугъырэр Адыгеим и ЛIышъхьэ къыIуагъ.
«Мы Iофыгъор зэрэхэгъэгоу щызэшIотхынэу едгъэжьагъ ыкIи илъэс благъэхэм къакIоцI шъолъыр зэфэшъхьафхэм, Адыгеири ахэм зэрахэтэу, еджапIэхэр ащытшIынхэ ыкIи зыпкъ ащидгъэуцожьынхэ мурад тиI. Унашъоу ащкIэ ищыкIагъэхэри тштэщтых», — икIэухым къыIуагъ Дмитрий Медведевым.
Адыгэ Республикэм и ЛIышъхьэ ипресс-къулыкъу
adygheya.ru
Comments
Post a Comment