Адыгэ Республикэ: КъумпIыл Мурат псы зыдэуагъэ чIыпIэхэм ащыIагъ


ЖъоныгъуакIэм и 25-м пчыхьэм ехъулIэу Кощхьэблэ, Джэджэ ыкIи Шэуджэн районхэм япсэупIэ 14-мэ, псыхъохэу Фарзэрэ Щэхъураджэрэ алъэныкъокIэ щыIэхэм, псыр акIэуагъ.

Шэуджэн районым «Щынэгъошху» зыфиIорэ режимыр щагъэуцугъ. Кощхьэблэ ыкIи Джэджэ районхэм «Чрезвычайнэ ситуациекIэ» зэджэхэрэ режимыр ащагъэуцугъ.

Адыгеим и ЛIышъхьэ ипшъэрылъхэр пIэлъэ гъэнэфагъэкIэ зыгъэцакIэрэр псэупIэхэу Дондуковскэм, Дружбэм, къуаджэхэу Хьакурынэхьаблэ, Джыракъые ыкIи Къэбэхьаблэ анахь гумэкIыгъо чIыпIэхэу яIэхэм ащыIагъ.

ЖъоныгъуакIэм и 25-м сыхьатыр 18-м ехъулIэу щагу 252-мэ, псэупIэ унэ 16-мэ, зы трансформаторнэ подстанцие, зы псыкъычIэщыпIэ псыр къакIэуагъ, лъэсрыкIо лъэмыджитIу фыкъуагъэ хъугъэ.


Муниципальнэ образованиехэмрэ къоджэ псэупIэхэмрэ япащэхэм КъумпIыл Мурат афишIыгъэ зэIукIэм анахьэу анаIэ зыщытыраригъэдзагъэр автомобиль гъогухэм ящынэгъончъагъ, Iофхэм язытет нахь дэй хъумэ игъом цIыфхэм макъэ ягъэIугъэныр, псэу зэшъощтхэр ыкIи гъомылапхъэхэр тэрэзэу аIэкIэгъэхьэгъэнхэр ары. АР-м псэолъэшIынымкIэ и Министерствэ пшъэрылъ фишIыгъ нэпкъхэм ягъэпытэнкIэ джыри ищыкIэгъэщт техникэр аIэкIигъэхьанэу.

Адыгеим ирайони 4-мэ «Чрезвычайнэ ситуацием» ирежим ащагъэуцугъ

Адыгэ Республикэм и ЛIышъхьэ ипшъэрылъхэр пIэлъэ гъэнэфагъэкIэ зыгъэцэкIэрэ КъумпIыл Мурат жъоныгъуакIэм и 26-р къызщихьащт чэщым Шэуджэн районымкIэ къуаджэу Къэбэхьаблэ щыIагъ ыкIи ошIэ-дэмышIагъэ зыхэлъ тхьамыкIагъохэм якIэуххэм ядэгъэзыжьынрэ Адыгэ Республикэм машIом зыкъыщимыштэным иIофыгъохэмрэ афэгъэзэгъэ комиссием изэIукIэгъу зэхищэгъагъ. Ащ хэлэжьагъэх Адыгэ Республикэм иминистрэхэм я Кабинет хэтхэр, муниципальнэ образованиехэу гумэкIыгъо чIыпIэ ифагъэхэм япащэхэр.


ЖъоныгъуакIэм и 26-м къыщегъэжьагъэу Шэуджэн, Красногвардейскэ, Кощхьэблэ ыкIи Джэджэ районхэм «Чрезвычайнэ ситуациекIэ» зэджэхэрэ режимыр ащагъэуцугъ.

ЖъоныгъуакIэм и 26-м пчэдыжьым сыхьатыр 6-м дэжь зэрагъэунэфыгъэмкIэ, щагу 225-мэ, цIыфхэр зыщыпсэурэ унэ 13-мэ, зы трансформаторнэ подстанцие, зы псыкъычIэщыпIэ псыр къакIэуагъ, лъэсрыкIо лъэмыджитIу зэхэкъутагъэ хъугъэ. Ощхым зэрарышхо къызфихьыгъэр муниципальнэ образовании 3-мэ япсэупIэ 14 (Кощхьэблэ, Джэджэ, Шэуджэн районхэр).


Псыхъоу Фарзэ ипс зыкъызэриIэтыгъэм къыхэкIэу къуаджэу Хьакурынэхьаблэ дамбэр къыщыIуиутыгъ. Ащ къыхэкIэу цIыфхэр зыщыпсэурэ унэ 15-мэ псыр къакIэуагъ. Джэджэ районымкIэ псэупIэу Новэм дэт псыуцупIэу Центральнэм шлюзэр къызэрэщыIуиутыгъэм къыхэкIэу Шэуджэн районымкIэ къутырэу Задунаевскэм дэт хэпIэ 11-мэ псыр акIэоным ищынагъо щыIэ хъугъэ. Ахэм ащыпсэухэрэр пIэлъэ гъэнэфагъэкIэ цIыфхэр зыдащэхэрэ пунктым игъом агъэкощыгъэх.

КъумпIыл Мурат пшъэрылъ къафишIыгъ ощхышхохэм апкъ къикIыгъэ гумэкIыгъом икIэуххэр амал зэриIэкIэ нахь псынкIэу дэгъэзыжьыгъэнхэм акIуачIэ зэкIэми зэдырахьылIэнэу, техникэу къашъхьапэщтыр аIэкIагъэхьанэу, зэрар зыхьыгъэ цIыфхэм яшIуагъэ арагъэкIынэу. Адыгэ Республикэм и ЛIышъхьэ ипшъэрылъхэр зыгъэцакIэрэр чэщ реным лъыплъагъ дамбэхэм ягъэпытэнкIэ, джащ фэдэу нэпкъхэм ягъэпытэн епхыгъэ Iофтхьабзэхэм язэшIохынкIэ Iофхэр зэрагъэцакIэхэрэм.

Дамбэхэр амал зэриIэкIэ нахь псынкIэу зыпкъ игъэуцожьыгъэнхэм иIоф къыхагъэлэжьагъэх Урысыем и МЧС икъутамэу Адыгэ Республикэм щыIэм, цIыфхэм якъэухъумэнкIэ ыкIи ошIэ-дэмышIагъэ зыхэлъ IофхэмкIэ Адыгэ Республикэм и Комитет ялIыкIохэр, джащ фэдэу техникэри аIэкIагъэхьагъ, материалхэу къашъхьапэщтхэри аращалIэх. ПстэумкIи нэбгырэ 310-мэ, техникэ 57-мэ псыр зыкIэогъэ чIыпIэхэм Iоф ащашIэ.

Шэуджэн районым щызэшIуахырэ IофшIэныр КъумпIыл Мурат ежь ышъхьэкIэ еуплъэкIу

Ощхышхохэм апкъ къикIэу псыр зыкIэогъэ псэупIэхэр 14-м нэсыгъэх. Кощхьэблэ ыкIи Джэджэ районхэм Шэуджэн районри къахэхъуагъ.

Пчэдыжьым жьэу КъумпIыл Мурат Шэуджэн районым ит къуаджэу Хьакурынэхьаблэ къулыкъу гъэнэфагъэхэм япащэхэм зэIукIэ щадишIыгъагъ. Сыхьатыр 5-м дэжь псыхъоу Фарзэ дамбэр къыщыIуиутыгъ ыкIи унэ 18-мэ псыр къакIэуагъ.

ЗэкIэми апэу зэшIохыгъэн фэе пшъэрылъэу КъумпIыл Мурат къыгъэуцугъэр зыфэгъэхьыгъэр цIыфхэм япсэупIэхэм къызэракIаорэр къызэтеIэжэгъэныр ары. Ащ пае республикэм иIэшъхьэтет пшъэрылъ афишIыгъ псыдэкIыпIэхэр ашIынхэу, псыр къызыщыдэкIын ылъэкIыщт чIыпIэхэм пшахъо зэрылъ дзыохэр аращэлIэнхэу.


Кощхьэблэ ыкIи Джэджэ районхэми ащ фэдэ IофшIэныр ащэкIо, къулыкъухэм псыр нахь чыжьэу лъымыкIотэнымкIэ Iофтхьэбзэ гъэнэфагъэхэр зэшIуахыгъэх. Аужырэ къэбархэм уакъыпкъырыкIын хъумэ, хэпIэ 220-м ехъумэ ыкIи цIыфхэр зычIэс унэ 13-мэ псыр зэракIэуагъэу щыт. Щагуи 100-м ехъумэ ыкIи унэ заулэмэ псыр арытыжьэп. Мэкъумэщ лэжьэкIупIэ гектар мини 2-м нэсмэ псыр акIэуагъ.

Урысыем и МЧС и ГъэIорышIапIэу Адыгэ Республикэм щыIэм къызэритыгъэмкIэ, нэбгырэ 300 фэдиз зычIэфэщт пунктхэр агъэхьазырыгъэх, псыр, гъомылапхъэр ыкIи медикаментхэр аIэкIэгъэхьэгъэнхэм епхыгъэ Iофыр зэрищыкIагъэм тетэу зэхащагъ.

Адыгеим и ЛIышъхьэ ипшъэрылъхэр пIэлъэ гъэнэфагъэкIэ зыгъэцакIэрэр Шэуджэн районым щыI, зэрар зыхьыгъэхэм IэпыIэгъу ятыгъэнымкIэ IофшIэнхэр зэрэкIорэр ежь ышъхьэкIэ еуплъэкIу.

Адыгэ Республикэм ипресс-къулыкъу

Сурэтхэр А. Гусевым тырихыгъэх



Comments