Friday, 28 April 2017

КъумпIыл Мурат Адыгэ республикэм ипэщагъэхэм аIукIагъ


Адыгэ Республикэм и ЛIышъхьэ ипшъэрылъхэр пIэлъэ гъэнэфагъэкIэ зыгъэцэкIэрэ КъумпIыл Мурат илъэс пчъагъэхэм къакIоцI республикэм пэщэныгъэ дызезыхьэгъэхэ Джарымэ Аслъанрэ ТхьакIущынэ Аслъанрэ аIукIагъ.

ЗэIухыгъэ зэдэгущыIэгъоу кIуагъэм социальнэ-экономическэ Iофыгъохэм, шъолъырым хэхъоныгъэхэр ышIынхэмкIэ амалэу щыIэхэм ащатегущыIа­гъэх. Социальнэ лъэныкъом, фе­деральнэ программэхэм ягъэ­цэкIэн, лъэпкъ ыкIи дин зэгу­рыIоныгъэр гъэпытэгъэным фэIо­рышIэрэ гухэлъхэр щыIэныгъэм щыпхырыщыгъэнхэм мэхьанэ­шхо аратыгъ.


КъумпIыл Мурат къызэрэхи­гъэ­щыгъэмкIэ, шъолъырым и ЛIышъхьэ IэнатIэ Iутыр республикэм ипащэу ыпэкIэ Iоф зышIагъэхэм аIукIэныр шэнышIу афэхъугъэу щыт, ар игуапэу тапэкIи ежь лъигъэкIотэным фэхьазыр.

— Илъэс пчъагъэхэм къакIоцI Адыгеим пэщэныгъэ дызешъу­хьагъ, политикэм ыкIи щыIэ­ныгъэм алъэныкъокIэ опытышхо шъуIэкIэлъ. Урысые Федераци­ем исубъектэу щыт Адыгэ Республикэр ылъэ пытэу теуцо­ным­кIэ Iофышхо зэрэшъу­шIа­гъэм щэч хэлъэп. Сыдигъуи тигуапэу тызэIокIэ, упчIэжьэгъу тызэфэхъужьы, — къыIуагъ АР-м и ЛIышъхьэ ипшъэрылъхэр пIэлъэ гъэнэфагъэкIэ зыгъэ­цакIэрэм.

Джарымэ Аслъанрэ ТхьакIу­щынэ Аслъанрэ къызэраIуагъэм­кIэ, регионым хэхъоныгъэхэр ышIынхэр пащэм ипшъэрылъ шъхьаIэу сыдигъуи щыт. Ащ фэ­дэ екIолIакIэр цIыфхэм щы­IэкIэпсэукIэ амалэу яIэхэр нахьышIу шIыгъэным ылъапс.


ЗэдэгущыIэгъум хэлэжьагъэ­хэм гуфэбэныгъэ хэлъэу агу къагъэкIыжьыгъ 2002-рэ илъэ­сым щыублагъэу 2007-рэ илъэ­сым нэс республикэм ипащэу щытыгъэ Шъэумэн Хьазрэт. Ащ ишIушIагъэкIэ социальнэ мэхьанэ зиIэ Iофыгъуабэхэр, пшъэрылъхэр зэшIохыгъэ зэрэ­хъугъэхэр къаIуагъ.

Джарымэ Аслъан къызэрэхи­гъэщыгъэмкIэ, республикэр зы­зэхащагъэм иапэрэ илъэсхэм политикэм епхыгъэ Iофыгъохэм ягъэцэкIэн анахьэу анаIэ тыра­гъэтын фэягъ. Ежьхэм къакIэ­лъы­кIогъэ командэхэм экономикэм, социальнэ зыпкъитыныгъэм епхыгъэ пшъэрылъхэр зэшIуахынхэр къапыщылъыгъ. Ахэм ащыщ проектыбэхэр шIуа­гъэ къытэу гъэцэкIагъэ хъугъэх.


Адыгеир непэ Урысыем зэрэ­щашIэрэр къыхигъэщыгъ нэужым гущыIэ зыштэгъэ ТхьакIу­щынэ Аслъан. Экономикэм, мэ­къумэщ хъызмэтым, псэолъэ­шIы­ным, зекIоным, нэмыкI лъэ­ныкъохэмкIи республикэм опытышхо IэкIэлъ хъугъэ. Шъолъы­рым гъэхъагъэу ышIыхэрэм къэралыгъом ипащэхэм осэшIу къыфашIы.

Мыщ дэжьым КъумпIыл Му­рат къызэриIуагъэмкIэ, АР-м иминистрэхэм я Кабинет непэ ыпашъхьэ щыт пшъэрылъ шъхьа­Iэхэм ащыщых федеральнэ гупчэм Iоф зэрэдашIэрэр джыри нахь гъэлъэшыгъэныр, инвестициехэм ахэгъэхъогъэныр, ащ къыкIэлъыкIоу цIыфхэм ящыIэ­кIэпсэукIэ нахьышIу шIыгъэныр. Урысыем ишъолъырхэм зэпхыныгъэу, зэфыщытыкIэу ады­ряIэр гъэпытэгъэным иIофыгъуи зэдэгущыIэгъум къыщаIэтыгъ.

ТХЬАРКЪОХЪО Адам

 Адыгэ Макъ


No comments:

Post a Comment