Wednesday, 20 September 2017

КъумпIыл Муратрэ Владимир Свеженецрэ Мыекъуапэ зэIукIэгъу щызэдыряIагъ


Адыгэ Республикэм и ЛIышъхьэу КъумпIыл Муратрэ Урысые Федерацием мэкъу-мэщымкIэ и Министерствэ къуаджэхэм хэхъоныгъэ ягъэшIыгъэнымкIэ и Департамент ипащэу Владимир Свеженецрэ Адыгэ Республикэм и Правительствэ зычIэт унэм тыгъуасэ зэIукIэгъу щызэдыряIагъ.

Къуаджэхэм, хъызмэт цIыкIухэм хэхъоныгъэ ашIынымкIэ амалэу щыIэхэм, федеральнэ программэхэм къадыхэлъытагъэу Урысые Федерацием мэкъу-мэщымкIэ и Министерствэ аIэкIигъэхьэрэ мылъкур республикэм зэрэщагъэфедэрэм атегущыIагъэх.

ЗэIукIэгъур рамыгъажьэзэ, Адыгэ Республикэм мэкъу-мэщымкIэ иминистрэу Юрий Петровым кIыгъоу Владимир Свеженец республикэм икъоджэ заулэмэ ащыIагъ, фермерхэм адэгущыIагъ, федеральнэ программэхэмкIэ агъэпсырэ псэуалъэхэр зэригъэлъэгъугъэх. Ахэм ащыщых фельдшер-мамыку IэзапIэу къутырэу Казенно-Кужорскэм щашIырэр, къутырэу ХьапэкIаем щагъэпсырэ гурыт еджапIэу 2018-рэ илъэсым аухынэу щытыр.

«Непэ псэолъабэмэ язытет зэдгъэлъэгъугъ. Гъэхъагъэ хэлъэу республикэм программэм къыдыхэлъытэгъэ Iофтхьабзэхэр зэрехьэх, шIуагъэ къытэу федеральнэ мылъкур егъэфедэ, къуаджэхэм щыIэкIэ-псэукIэу адэлъыр нахьышIу мэхъу. Гурыт еджапIэхэм яшIынкIэ къихьащт илъэсым мылъкур нахьыбэу къэттIупщынэу итэхъухьэ», — къыIуагъ Владимир Свеженец.

Джащ фэдэу Департаментым идиректор субсидие зыкIыр къаратынымкIэ фэгъэкIотэныгъэу щыIэхэм, ащ тетэу грантхэм ягощын республикэм зэригъэкIоным ифитыныгъэ иIэ зэрэхъурэм къатегущыIагъ. Адыгеим щыщ специалистхэм кооперацием хэхъоныгъэ егъэшIыгъэнымкIэ семинар заулэхэм ащыIэнхэу игъо къафилъэгъугъ.

«Тэ федеральнэ гупчэм зэпхыныгъэу дытиIэр нахь дгъэлъэшы, программэ пстэуми тахэлажьэ тшIоигъу. Шъыпкъэ, мэкъу-мэщым хэхъоныгъэ егъэшIыгъэнымкIи, чIыгулэжьхэм нахьыбэу хахъо яIэнымкIи, къуаджэм исоциальнэ, иинженер инфраструктурэ зягъэушъомбгъугъэнымкIи ащ ишIуагъэ къэкIощт. Адыгэ къуаер тиреспубликэ нэмыкI къыщыдэмыгъэкIыгъэнымкIэ къызэрэддырагъэштагъэм ишIуагъэкIэ амалыкIэхэр тиIэ зэрэхъугъэр тэ къыдгурэIо. Ащ епхыгъэу джыдэдэм пшъэрылъэу щытыр щэр нахьыбэу къэхьыжьыгъэныр, адыгэ къуаем икъыдэгъэкIынкIэ амалэу щыIэхэм зягъэушъомбгъугъэныр ары», — хигъэунэфыкIыгъ КъумпIыл Мурат.

Адыгеим и ЛIышъхьэ мэкъумэщ къыдэгъэкIыжьыным зэхъокIыныгъэ фэшIыгъэнымкIэ, пынджлэжьынымрэ хэтэрыкIлэжьынымрэ зягъэушъомбгъугъэнымкIэ, пхъэшъхьэ-мышъхьэхэр нахьыбэу къэхьыжьыгъэнхэмкIэ Iофэу зэшIуахыхэрэр къыIотагъэх. Хъызмэт инхэм, унэгъо былымэхъо фермэхэм робототехникэр ащыгъэфедэгъэнымкIэ, гъэфедэкIо кооперативхэр зэхэщэгъэнхэмкIэ, хъызмэт цIыкIухэм хэхъоныгъэ ягъэшIыгъэнымкIэ амалэу щыIэхэм атегущыIагъэх.

Унэе IэпыIэгъу хъызмэтхэмрэ фермэхэмрэ федэ къахьын зэралъэкIыщтыр къыдалъытэзэ, Iоф зышIэнэу езыгъэжьэгъэкIэ фермерхэмрэ унэгъо былымэхъо фермэхэмрэ яIоф кIэгъэгушIугъэнхэм атегъэпсыхьэгъэ Iофтхьабзэхэр республикэм щызэрахьэх. ГущыIэм пае, лэжьэныр езыгъэжьэгъэкIэ фермер 35-мэ, мэкъумэщ хъызмэтшIэпIи 7-мэ унэгъо былымэхъо фермэхэм зягъэушъомбгъугъэным пае 2016-рэ илъэсым грантхэр аратыгъагъэх. Мы илъэсым унэгъо былымэхъо фермэм зегъэушъомбгъугъэным пае фермер 31-мэ, хъызмэтшIэпIитIумэ грантхэр аратыгъэх.

Адыгэ Республикэм мэкъу-мэщымкIэ и Министерствэ къызэритыгъэмкIэ, къэралыгъо IэпыIэгъум ишIуагъэкIэ мэкъумэщышIэ (фермер) хъызмэтшIэпIэ 20-м нахь мымакIэу, унэгъо былымэхъо ферми 3-м нахь мымакIэу илъэс къэс зэхащэнэу рахъухьэ.

Адыгэ Республикэм и ЛIышъхьэ ипресс-къулыкъу

adygheya.ru

No comments:

Post a Comment