Мэфэхьаблэ ичIыгу хапIэхэр нахь тэрэзэу агъэфедэнэу дэлэжьэщтых


ШышъхьэIум и 11-м, Адыгэ Республикэм и "къэзыгъэзэжьыгъэхэм адэIэпыIэрэ фондым" и Мэфэхьаблэ щыIэ хапIэхэр нахь тэрэзэу агъэфедэным дэлажьэрэ комисием зэхэсыгъо иIагъ. Ащ хэлэжьагъэх къэзыгъэзэжьыгъэхэм адэIэпыIэрэ зэхэт купхэр. Зэхэсыгъор зэрищагъ Адыгэ Республикэм лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет ипащэу Шъхьэлэхъо Аскэр.

Нахь Iофыгъо шъхьаIэу зытегущыIагэхэр Мэфэхьаблэ щыIэ хапIэхэр заратыгъэхэм ащыщхэм унэхэр зэрэщамышIыхэрэр ары ыкIи а хапIэхэр зэрамыукъэбзыхэрэр ары.

Мы IофымкIэ зэхэсыгъом хэлэжьагъэхэм яеплъыкIэхэр зэфэдагъэх. Илъэсбэ хъугъэу хапIэхэр зэратыгъэхэм ащыщхэу унэхэр зимышIыгъэхэм, а хапIэхэр аIырахыжьын фаеу алъытагъ ыкIи ахэр унэ щашIынэу амал зиIэхэм аратынэу.
МыщкIэ къыхагъэщыгъ Мэфэхьабэ хапIэ 800 фэдиз аугощынэу джыри зэрэщыIэр. Унэу ашIыхэрэр къызэкIэлъыкIохэу, зэпэмыкIыжьэу хъуныхэм пае хапIэхэр аратыщт унэ зыфэшIыщтхэм. ХапIэхэр заIырахыжьыщтхэм тапэкIэ амал яIэ зыхъукIэ джыри зэ хапIэхэр аратын алъэкIыщт.

Мы Iофым фемыжьэхэзэ, апэу, хапIэхэм яIоф зытетыр, ахэр зиIыгъэхэм я список зэхагъэуцонэу зэдащтагъ. Ар шышъхьэIум и 25-рэ нэс агъэхьазырын фае. ЫтIанэ ащ елъытыгъэу унашъохэр ащтэщтых.




Comments